Category Archives: IND NZ

ඉන්දියාව යළිත් පළමු තැනට

සංචාරක නවසීලන්ත කණ්ඩායමට එරෙහිව ඉන්දෝර්හි හුල්කර් කී‍්‍රඩාංගණයේදී පැවැති තෙවැනි ටෙස්ට් කි‍්‍රකට් තරගයෙන් ලකුණු 321 ක් ජයක් ලැබූ ඉන්දීය කණ්ඩායම තරග 3 කින් සමන්විත වූ ටෙස්ට් තරගාවලිය 3-0 ක් ලෙස ජයගැනීමට සමත් විය.

ඒ අනුව නැවතත් වරක් ටෙස්ට් ශ්‍රේණිගත කිරීම්වල පළමු ස්ථානයට පැමිණීමට ඉන්දීය කණ්ඩායමට හැකිවූ අතර තරගයෙන් අනතුරුව ශ්‍රේණිගත කිරීම්වල අංක එකට පත්වන කණ්ඩායමට ලබාදෙන සෙංකෝලය අන්තර් ජාතික කි‍්‍රකට් සභාව වෙනුවෙන් සුනිල් ගවස්කාර් මහතා විසින් ඉන්දීය කණ්ඩායමේ නායක විරාට් කෝලිට ලබාදෙන ලදි.

ජයග‍්‍රණය සඳහා ලකුණු 475 ක ඉක්කයක් හඹාගිය නවසීනලන්ත කණ්ඩායමේ දෙවැනි ඉනිම ලකුණු 153 කට සීමා කිරීමට රවිචන්ද්‍රන් අශ්වින් ප‍්‍රමුඛ ඉන්දීය පන්දුයවන්නෝ සමත් වූහ.

නවසීලන්ත දෙවැනි ඉනිම සුනුවිසුණු කර දැමූ රවිචන්ද්‍රන් අශ්වින් ලකුණු 59 කට කඩුලූ 7 ක් දවාගත් අතර ඉන් 4 ක්ම පන්දුව කෙළින්ම කඩුල්ලේ වැදීමෙන් දැවීගිය අවස්ථා විය. එය ඔහුගේ ඉනිමක හොඳම පන්දුයැවීම ලෙස වාර්තා අතරට එක් විය.

මෙම තරගයේදී සිය ටෙස්ට් දිවියේ හොඳම පන්දුයැවීමද ප‍්‍රදර්ශනය කළ රවිචන්ද්‍රන් අශ්වින් ලකුණු 140 කට කඩුලූ 13 ක් දවාගත්තේ පළමු ඉනිමේදී ලකුණු 81 කට දවාගත් කඩුලූ 6 ත් සමගිනි.

පිතිකරුවන් 5 දෙනෙක්ම ලකුණු 10 සීමාව ඉක්මවායෑමට පෙර දැවී යාම නවසීලන්තයට විශාල පාඩුවක් විය. නවසීලන්ත දෙවැනි ඉනිමේ වැඩිම ලකුණු ලාභියා වූ රොස් ටේලර් හයේ පහරක් සහ හතරේ පහර 5 ක් සමගින් ලකුණු 32 ක් රැුස්කළ අතර බී. ජේ. වොට්ලිං ලකුණු 23 ක් ලබා ඉනිම නිමාවන තුරු නොදැවී සිටියේය.

සිව්වැනි දිනය (11 වැනිදා) සඳහා තරගය ආරම්භ කරන විට දෙවැනි ඉනිම වෙනුවෙන් කිසිවෙකු නොදැවී ලකුණු 18 ක් ලබා සිටි ඉන්දීය කණ්ඩායම, දිවා ආහාරයෙන් අනතුරුව ලකුණු 216 කට කඩුලූ 3 දැවී සිටි අවස්ථාවේ ඉනිම අත්හිටුවා නවසීලන්ත කණ්ඩායමට පන්දුවට පහරදීමට ආරාධනා කර සිටියේය.

අද දිනයේදී සිය 8 වැනි ටෙස්ට් ශතකය ලබාගත් චෙතේෂ්වර් පුජාරා නොදැවී ලකුණු 101 ක් රැුස්කළ අතර ඊට හතරේ පහර 9 ක් ඇතුළත් විය. පන්දු 56 කදී හතරේ පහර 6 ක් සමගින් ලකුණු 50 ක් රැස්කළ ගෞතම් ගම්භීර් ඉන්දීය ඉනිමේ ලකුණු සංඛ්‍යාව ඉහළ දැමීම සඳහා පුජාරාට අනගි සහයක් දුන්නේය.

ඉන්දියාව පළමු ඉනිම – කඩුලූ 5 ක් දැවී 557
(ගෞතම් ගම්භීර් 29, චෙටේස්වාර් පුජාරා 41, විරාට් කෝලි 211, අජින්ක්‍යා රහනේ 188, රෝහිත් ෂර්මා නොදැවී 51, රවීන්ද්‍ර ජදේජා නොදැවී 17, ටෙ‍්‍රන්ට් බෝල්ට් 113/2, ජීටන් පතෙල් 120/2)

නවසීලන්තය පළමු ඉනිම – සියලූ දෙනා දැවී 299
(මාටින් ගප්ටිල් 72, ටොම් ලෙතම් 53, ජේම්ස් නීෂම් 71, බී. ජේ. වොට්ලිං 23, මිචෙල් සෑන්ට්නර් 22, ජීතන් පතෙල් 18, මැතිව් හෙන්රි 15, රවිචන්ද්‍රන් අශ්වින් 81/6, රවීන්ද්‍ර ජදේජා 80/2)

ඉන්දියාව දෙවැනි ඉනිම – කඩුලූ 3 ක් දැවී 216
(මුරලි විජේ 19, ගෞතම් ගම්භීර් 50, චෙටේස්වාර් පුජාරා නොදැවී 101, විරාට් කෝලි 17, අජින්ක්‍යා රහනේ 23, ජීටන් පතෙල් 56/2)

නවසීලන්තය දෙවැනි ඉනිම – සියලූ දෙනා දැවී 153
(මාටින් ගප්ටිල් 29, කේන් විලියම්සන් 27, රොස් ටේලර් 32, බී. ජේ. වොට්ලිං නොදැවී 23, රවිචන්ද්‍රන් අශ්වින් 59/7, රවීන්ද්‍ර ජදේජා 45/2)

-036

 

අශ්වින් නවසීලන්තයට විනාශය ගෙනෙයි


පිතිකරුවන්ගේ භීතිකාව බවට පත්ව සිටින රවිචන්ද්‍රන් අශ්වින්ගේ පන්දු යැවීම හමුවේ නැවත වරක් අසරණ වූ නවසීලන්ත කණ්ඩායම ලකුණු 299 කට සීමා කළ ඉන්දියානුවෝ ඉන්දෝර්හිදී පැවැත්වෙන තුන්වැනි ටෙස්ට් ක්‍රිකට් තරගයේදී ලකුණු 258 ක මුල් ඉනිමේ වාසියක් අත්කරගත්හ.

තරගයේ තුන්වැනි දිනය වූ අද (10 වැනිදා) සවස ක්‍රීඩාව නතර කරන විට සිය දෙවැනි ඉනිම වෙනුවෙන් කිසිවකු නොදැවී ලකුණු 18 ක් ලබා සිටි ඉන්දිය කණ්ඩායම දින දෙකක් ඉතිරිව තිබියදී ලකුණු 276 කින් ඉදිරියට ගොස් සිටියේය.

මුල් ඉනිමේදී ලකුණු 200 ඉක්මවන වාසියක් තිබුණ නමුත් නවසීලන්ත පිතිකරුවන් තවදුරටත් අසරණ කරමින් තරගයේ අවසන් ඉනිමට තල්ලු කර දැමූ ඉන්දීය නායකයා දෙවැනි ඉනිම ආරම්භ කළේය.

ඉන්දීය ඉනිම ආරම්භ කළ ගෞතම් ගම්භීර් උරහිසේ ආබාධයක් හේතුවෙන් පිටියෙන් ඉවත්ව ගියේය. පන්දු රැකීමේදී උරහිසේ ආබාධයකට මුහුණ දුන් ගම්භීර් දෙවැනි ඉනිමේදී ලකුණක් කරා දිවයමින් සිටියදී සිය සීමාව සලකුණු කිරීම සඳහා ඉදිරියට පැන්නේය. එහිදී උරහිසේ ආබාධය නැවතත් මතුවූයෙන් පන්දුවට පහර දීම නවතා ආපසු ක්‍රීඩාගාරයට යෑමට ගම්භීර්ට සිදුවිය.

ඉන්දු – නවසීලන්ත තරගාවලියේදී මේ වනවිට කඩුලු 20 ක් දවාගනිමින් පන්දු යවන්නන් අතර පෙරමුණ ගෙන සිටින අශ්වින් අදත් ලකුණු 81 කට කඩුලු 6 ක් දවාගත්තේය. එය අශ්වින් විසින් ටෙස්ට් ඉනිමකදී කඩුලු 5 ක් හෝ ඊට වැඩියෙන් දවාගත් 20 වැනි අවස්ථාව විය.

නවසීලන්ත පිල වෙනුවෙන් මාටින් ගප්ටිල් (72) සහ ජේම්ස් නීෂම් (71) තරමක් ධෛර්වත් පිතිහරඹයක නිරත වූ නමුත් සෙසු පිතිකරුවෝ අශ්වින් හමුවේ අසාර්ථක වූහ.

ආරම්භක පිතිකරුවන් වූ ගප්ටිල් සහ ටොම් ලේතම් දෙදෙනාම අර්ධ ශතක ලබාගත් හෙයින් නවසීලන්ත ලකුණු පුවරුව වරෙක කිසිවකු නොදැවී ලකුණු 118 ක් සේ දිස්වූවද ලකුණු 30 ක් ඇතුළතදී කඩුලු 5 ක් බිඳවැටීමෙන් සංචාරකයෝ නොසිතූ අමාරුවක වැටුණහ. එම කඩුලු 5 ම හිමිකරගත් අශ්වින් විසින් මාටින් ගප්ටිල් දුවද්දී දවාගන්නා ලද්දේ පන්දුව කඩුල්ලට දමා ගැසීමෙනි.

ටෙස්ට් තරගාවලියේදී මේ වන විටත් 2-0 ක් ලෙසින් පෙරමුණ ගෙන සිටින ඉන්දියානුවන්ගේ සූදානම පිට පිට දෙවැනි වතාවටත් නවසීලන්තයට 3-0 ක සුද්දයක් දීමයි.


ඉන්දියාව පළමු ඉනිම – කඩුලු 5 ට 557
(මුරලි විජේ 10, ගෞතම් ගම්භීර් 29, චෙටේස්වාර් පුජාරා 41, විරාට් කෝලි 211, අජින්ක්‍යා රහනේ 188, රෝහිත් ෂර්මා නොදැවී 51, රවීන්ද්‍ර ජදේජා නොදැවී 17, ටේ‍රන්ට් බෝල්ට් 113/2, ජීටන් පතෙල් 120/2)

නවසීලන්තය පළමු ඉනිම – 299
(මාටින් ගප්ටිල් 72, ටොම් ලෙතම් 53, ජේම්ස් නීෂම් 71, බී. ජේ. වොට්ලිං 23, මිචෙල් සෑන්ට්නර් 22, ජීතන් පතෙල් 18, මැතිව් හෙන්රි 15, රවිචන්ද්‍රන් අශ්වින් 81/6, රවීන්ද්‍ර ජදේජා 80/2)

ඉන්දියාව දෙවැනි ඉනිම – කිසිවකු නොදැවී 18

 

 

කෝලි – රහනේ වාර්තාගත සම්බන්ධතාවක

සිය දෙවැනි ටෙස්ට් ද්විත්ව ශතකය ලබාගත් විරාට් කෝලි (211) සහ ද්විත්ව ශතකය පෙනි පෙනී දැවී ගිය අජින්ක්‍යා රහනේ (188) නිසා නවසීලන්තයට එරෙහිව ඉන්දෝර්හිදී පැවැත්වෙන තුන්වැනි ටෙස්ට් තරගයේ දෙවැනි දිනයේදී සිය පළමු ඉනිම වෙනුවෙන් කඩුලු 5 ක් දැවී ලකුණු 557 ක් ලබාගැනීමට ඉන්දීය කණ්ඩායම සමත් විය. ඊට පිළිතුරු වශයෙන් දිනය නිමා වන විට නවසීලන්ත කණ්ඩායම කිසිවකු නොදැවී ලකුණු 28 ක් ලබා සිටියේය.

ලකුණු 267 කට කඩුලු 3 ක් දැවී තිබියදී අද (9 වැනිදා) පෙරවරුවේ ක්‍රීඩාව ආරම්භ කළ ඉන්දීය නායකයා සහ අජින්ක්‍යා රහනේ ජීවයකින් තොර තණතීරුවේ උපරිම ප්‍රයෝජන උකහා ගනිමින් සිවුවැනි කඩුල්ල වෙනුවෙන් ලකුණු 365 ක සම්බන්ධතාවක් ගොඩනැංවූහ. සචින් තෙන්ඩුල්කාර් සහ වී.වී.එස්. ලක්‍ෂමන් එක්ව වසර 2004 දී ඕස්ටේ්‍රලියානු පිලට එරෙහින සිඞ්නි නුවරදී සිවුවැනි කඩුල්ල වෙනුවෙන් ගොඩනැංවූ ලකුණු 353 වාර්තාව කෝලි සහ රහනේ විසින් අද බිඳ දමන ලදි.

“මේ සම්බන්ධතාව ඉතාමත් වැදගත්”
“තරගයේ එක වෙලාවක අපි ලකුණු 100 කට කඩුලු 3 ක් අහිමි කරගෙන තිබුණා. ඒත් එතැන ඉඳලා ලකුණු 365 ක් ලබාගත්ත එක නම් හොඳ දෙයක් තමයි” යයි තරගයෙන් අනතුරුව රහනේ පැවසීය.

බටහිර ඉන්දීය කොදෙව් පිලට එරෙහිව පසුගිය ජූලි මාසයේදී සිය මංගල ටෙස්ට් ද්විත්ව ශතකය (200) ලබා සිටි ඉන්දීය නායකයා අද වාර්තා කළේ ඔහුගේ හොඳම ටෙස්ට් ඉනිමයි. අද පෙරවරුවේදී තරගය ආරම්භ කරන විට නොදැවී ලකුණු 103 ක් ලබා සිටි කෝලි, පිටියේ සෑම කොණකටම පන්දුව යවමින් හතරේ පහර 20 කින් සිය ඉනිම අලංකාර කළේය.

සිය 8 වැනි ටෙස්ට් ශතකය ලබාගත් රහනේ අද පෙරවරුවේ සිටම බවුන්සර් පන්දු වරුසාවකට මුහුණ දුන් අතර ඉන් එකක් ඔහුගේ හිස් ආවරණයේද වැදිණ. ඔහුගේ හොඳම ටෙස්ට් ඉනිමද මෙය වන අතර එය හතරේ පහර 18 කින් සමන්විත විය.


ඉන්දියාව -පළමු ඉනිම – කඩුලු 5 ට 557
(මුරලි විජේ 10, ගෞතම් ගම්භීර් 29, චෙටේස්වාර් පුජාරා 41, විරාට් කෝලි 211, අජින්ක්‍යා රහනේ 188, රෝහිත් ෂර්මා නොදැවී 51, රවීන්ද්‍ර ජදේජා නොදැවී 17, ටේ‍රන්ට් බෝල්ට් 113/2, ජීටන් පතෙල් 120/2)

නවසීලන්තය පළමු ඉනිම – කිසිවකු නොදැවී 28
(මාටින් ගප්ටිල් නොදැවී 17, ටොම් ලෙතම් නොදැවී 06)

 

කෝලි ශතකයකින් ඉන්දියාව ශක්තිමත් කරයි

සංචාරක නවසීලන්ත කණ්ඩායමට එරෙහිව ඉන්දියාවේ ඉන්දෝර්හි ‘හොල්කර්’ ක්‍රීඩාංගණයේදී අද (8 වැනිදා) ආරම්භ වූ තෙවැනි ටෙස්ට් ක්‍රිකට් තරගය පළමු දිනය සඳහා නතර කරන විට කඩුලු 3 ක් දැවී ලකුණු 267 ක් ලබා සිටි ඉන්දීය කණ්ඩායම තරගයේ වැඩි ගෞරව දිනා සිටියේය.

ඉන්දීය ඉනිමේ සිව්වැනි කඩුල්ල වෙනුවෙන් ලකුණු 167 ක නොබිඳුණ සම්බන්ධතාවක් ගොඩනැගූ නායක විරාට් කෝලි (නොදැවී 103) සහ අජින්ක්‍යා රහනේ (නොදැවී 79) ආරම්භක දිනයේදීම සිය කණ්ඩායම ඉහළට ඔසවා තැබූහ.

අද දිනයේදී සිය ටෙස්ට් ක්‍රිකට් දිවියේ 13 වැනි ශතකය ලබාගත් විරාට් කෝලි ඊට අලංකාර හතරේ පහර 10 ක් අන්තර්ගත කළේය. ඉන්දීය ඉනිම ගොඩනැගීම සඳහා කෝලිට අනගි සහයක් දුන් අජින්ක්‍යා රහනේගේ අර්ධ ශතකය හයේ පහරකින් සහ හතරේ පහර 9 කින් සමන්විත විය.

දිවා ආහාරය සඳහා තරගය නතර කරන විට ඉන්දීය කණ්ඩායම කඩුලු 2 ක් දැවී ලකුණු 75 ක් ලබා සිටියද, විරාට් කෝලි සමග එක්ව ඉන්දීය ඉනිමේ තෙවැනි කඩුල්ල වෙනුවෙන් චෙතේෂ්වර් පුජාරාට (41) එක්කළ හැකිවූයේ ලකුණු 40 ක් පමණි. මිචෙල් සෑන්ට්නර්ගේ පන්දුවක් කෙළින්ම කඩුලලේ වැදීමෙන් දැවීයන විට පුජාරාගේ ඉනිමට හතරේ පහර 6 ක් ඇතුළත් වී තිබිණ.

වසර 2 කට පමණ පසු නැවතත් ජාතික කණ්ඩායමට කැඳවා සිටින ආරම්භක පිතිකරු ගෞතම් ගම්භීර්, දිවා ආහරයට පෙර ආපසු ක්‍රීඩාගාරයට හරවා යැවීමට ටේ‍රන්ට් බෝල්ට් සමත් වූයේ කඩුල්ල මුවා කිරීමේ වරදට හසුකරගමිනි. මුලු ලකුණු සංඛ්‍යාව 60 ක් වන විට ඉන්දීය ඉනිමේ 2 වැනි කඩුල්ල ලෙස පිටියෙන් ඉවත්ව ගිය ගම්භීර් හයේ පහර 2 ක් සහ හතරේ පහර 3 ක් සමගින් ලකුණු 29 ක් ලබා සිටියේය. මැතිව් හෙන්රි යැවූ දෙවැනි ඕවරයේ තෙවැනි සහ සිව්වැනි පන්දු වලදී ගම්භීර් එම හයේ පහර දෙක ගැසීමට සමත් විය.

කාසියේ වාසිය දිනා පළමුවෙන් පන්දුවට පහරදුන් ඉන්දීය කණඩායමේ පළමු කඩුල්ල මුලු ලකුණු සංඛ්‍යාව 26 ක් වන විට බිඳවැටුණි. ලකුණු 10 ක් ලබා සිටි මුරලි විජේ ඉන්දීය ඉනිමේ පළමු කඩුල්ල ලෙස දැවී ගියේ ජීතන් පටේල්ගේ පන්දුවක් හමුවේ ටොම් ලේතම් අතට උඩ පන්දුවක් දෙමිනි.


ඉන්දියාව – පළමු ඉනිම කඩුලු 3 කට 267
(ගෞතම් ගම්භීර් 29, චෙතේෂ්වර් පුජාරා 41, විරාට් කෝලි නොදැවී 103, අජින්ක්‍යා රහනේ නොදැවී 79)


- 036

 

ඉන්දියානුවෝ ටෙස්ට් තරගාවලිය ජයගනිති

සංචාරක නවසීලන්ත කණ්ඩායමට එරෙහිව ඉන්දියාවේ කොල්කටාහි ඊඞ්න් ගාඞ්න්ස් ක්‍රීඩාංගණයේදී පැවැති දෙවැනි ටෙස්ට් ක්‍රිකට් තරගයෙන් ලකුණු 178 ක ජයක් අත්කරගැනීමට සත්කාරක ඉන්දීය කණ්ඩායම අද (3 වැනිදා) සමත් විය.

ඒ අනුව තරග 3 කින් සමන්විත ටෙස්ට් තරගාවලිය තවත් තරගයක් ඉතිරිව තිබියදීම 2-0 ක් ලෙස ජයගැනීමට ඉන්දීය ක්‍රීඩකයෝ සමත් වූහ. ඉනිම් දෙකේදීම නොදැවී අර්ධ ශතක ලබාගත් ඉන්දීය කණ්ඩායමේ කඩුලු රකින ක්‍රීඩක රිදිමන් සහා තරගයේ වීරයා ලෙසින් සම්මාන ලැබීය.

ජයග්‍රහණය සඳහා ලකුණු 376 ක ඉලක්කයක් හඹාගිය නවසීලන්ත කණ්ඩායමේ දෙවැනි ඉනිම ලකුණු 197 කට සීමා කිරීමට ඉන්දීය පන්දු යවන්නෝ සමත් වූහ. රවින්ද්‍ර ජදේජා, මොහොමඞ් සාමි සහ රවිචන්ද්‍රන් අෂ්වින් කඩුලු 3 බැගින් දවාගනිමින් ඉන්දීය කණ්ඩායමේ ජයග්‍රහණය ඉක්මන් කළහ.

දෙවැනි ඉනිමේදී අර්ධ ශතකයක් ලබාගැනීමට ආරම්භක පිතිකරු ටොම් ලේතම් (74) සමත් වුවත්, නවසීලන්ත කණ්ඩායම පරාජයෙන් ගළවාගැනීමට එය කිසිසේත් ප්‍රමාණවත් නොවීය. රවිචන්ද්‍රන් අෂ්වින්ගේ පන්දුවක් හමුවේ රිදිමන් සහා අතට උඩපන්දුවක් දෙමින් දැවී යනවිට ලේතම්ගේ ඉනිමට හතරේ පහර 8 ක් ඇතුළත් වී තිබිණ.

නවසීලන්ත කණ්ඩායමේ පළමු කඩුල්ල ලෙස මාටින් ගප්ටිල් ලකුණු 24 කට පිටියෙන් ඉවත් කිරීමට රවිචන්ද්‍රන් අෂ්වින් සමත් වූ අතර රවින්ද්‍ර ජදේජාගේ පන්දුවක් හමුවේ දැවීයන විට හෙන්රි නිකලස් ලබාසිටියේද ලකුණු 24 ක් පමණි.

මුලු ලකුණු සංඛ්‍යාව 115 ක් වන විට නවසීලන්ත කණ්ඩායමේ තෙවැනි කඩුල්ල ලෙස ලකුණු 4 ක් ලබාසිටි රොස් ටේලර් ආපසු ක්‍රීඩාගාරයට හරවා යැවීමට අෂ්වින් සමත් විය. හතරේ පහර 4 ක් සමගින් ලකුණු 32 ක් ලබාසිටි ලුක් රොන්කි දැවීගියේ ජදේජාගේ පන්දුවක් කෙළින්ම කඩුල්ලේ වැදීමෙනි.

තරගයේ සිව්වැනි දිනය වූ අද (3 වැනිදා) තරගය ආරම්භ කරන විට දෙවැනි ඉනිම වෙනුවෙන් පන්දුවට පහරදෙමින් සිටි ඉන්දීය කණ්ඩායම කඩුලු 8 ක් දැවී ලකුණු 227 ක් ලබා සිටියේය. දිනයේ පළමු කඩුල්ල ලෙස ලකුණු 23 ක් ලබා සිටි බුවනේෂ්වර් කුමාර් දැවීගියේ නීල් වැග්නර්ගේ පන්දුවක් හමුවේ හෙන්රි නිකලස් අතට උඩපන්දුවක් දෙමිනි.

ඉන්දීය කණ්ඩායමේ අවසන් පිතිකරුවා ලෙස පිටියට පිවිසි මොහොමඞ් සාමිට වැඩි වේලාවක් පිටියේ රැදී සිටීමට ටේ‍රන්ට් බෝල්ට් ඉඩ නොදුන් අතර ටොම් ලේතම් අතට උඩපන්දුවක් දෙමින් ඔහු 1 ලකුණකට දැවී ගියේය.


ඉන්දියාව – පළමු ඉනිම 316
නවසීලන්තය – පළමු ඉනිම 204
ඉන්දියාව – දෙවැනි ඉනිම සියලු දෙනා දැවී 263

(ෂිකාර් ධවාන් 17, විරාට් කෝලි 45, රෝහිත් ෂර්මා 82, රිදිමන් සහා නොදැවී 58, බුවනේෂ්වර් කුමාර් 23, ටේ‍රන්ට් බෝල්ට් 38/3, මැතිව් හෙන්රි 59/3, මිචෙල් සෑන්ට්නර් 60/3)

නවසීලන්තය – දෙවැනි ඉනිම සියලු දෙනා දැවී 197
(ටොම් ලේතම් 74, මාටින් ගප්ටින් 24, හෙන්රි නිකලස් 24, ලුක් රොන්කි 32, මැතිව් හෙන්රි 18, රවින්ද්‍ර ජදේජා 41/3, මොහොමඞ් සාමි 46/3, රවිචන්ද්‍රන් අෂ්වින් 82/3)


- 036

 

ඉන්දියානුවෝ ඉදිරියට පනිති

පිතිකරු ලයිස්තුවේ පහළින් පැමිණි රෝහිත් ෂර්මා (82) සමග එක්වූ රිදිමන් සහා (නොදැවී 39) හත්වැනි කඩුල්ල වෙනුවෙන් ගොඩනැංවූ ලකුණු 103 ක සම්බන්ධතාව නිසා නවසීලන්තයට එරෙහිව කොල්කටාවේ ඊඞ්න් ගාර්ඞ්න්ස් ක්‍රීඩාංගණයේදී පැවැත්වෙන දෙවැනි ටෙස්ට් තරගයේදී සිය දෙවැනි ඉනිම වෙනුවෙන් කඩුලු 8 ක් දැවී ලකුණු 227 ක් ලබාගැනීමට ඉන්දියානුවෝ සමත් වූහ. මුල් ඉනිමේදී ලබාගත් ලකුණු 112 ක වාසියත් සමගින් තරගයේ තුන්වැනි දිනය වන අද සවස ක්‍රීඩාව නතර කරන විට ඉන්දීය පිල නවසීලන්තයට වඩා ලකුණු 339 ක් ඉදිරියෙන් සිටියේය.

කෙසේ වෙතත් පළමු ඉනිමේදී කළ හපන්කම් දෙවැනි ඉනිමේදී කිරීමට ඉන්දියානු පිතිකරුවන්ට අවසර නොදුන් නවසීලන්ත පන්දු යවන්නන් වූ මැතිව් හෙන්රි සහ මිචෙල් සෑන්ට්නර් කඩුලු 3 ක් බැගින් බෙදා ගනිද්දී වමතින් වේග පන්දු යවන ටේ‍රන්ට් බෝල්ට් තවත් කඩුලු දෙකක් දවාගත්තේය.

“මේ තණතීරුවේ පන්දවට පහර දෙන එක සෙල්ලමක් නෙමේ. කිසිම ආකාරයකින් බුරුළක් ලබාගන්න බෑ” යයි තරගයෙන් අනතුරුව රෝහිත් ෂර්මා පැවසීය.

නවසීලන්ත වේග පන්දු යවන්නන් වූ ටේ‍රන්ට් බෝල්ට් සහ මැතිව් හෙන්රි දෙදෙනා එක්ව කඩුලු 5 ක් බෙදාහදාගත් අතර කඩුලු 4 කට 43 ක් ව තිබූ ලකුණු පුවරුව කඩුලු 5 ට 91 ක් ලෙස වෙනස් වූයේ විරාට් කෝලිගේ ඉනිමෙනි. පිතිකරුවන් එකා පිට එකා දැවී යද්දී තරමක් නිර්භයව පන්දුවට පහර දුන් ඉන්දීය නායකයා පන්දු 65 කින් ලකණු 45 ක් ලබාගත්තේ හතරේ පහර 7 ක් සිය ඉනිමට ඇතුළත් කරමිනි.

රවිචන්ද්‍රන් අශ්වින් ලකුණු 5 කට දැවී ගියත් රෝහිත් ෂර්මා සහ රිදිමන් සහා එක්ව ඉන්දීය පිලේ වාසිය ලකුණු 300 න් ඉහළට ඔසවා තැබූහ.


ඉන්දියාව – පළමු ඉනිම 316
නවසීලන්තය -පළමු ඉනිම 204
ඉන්දියාව – දෙවැනි ඉනිම කඩුලු 8 ක් දැවී 227

(ෂිකාර් ධවාන් 17, විරාට් කෝලි 45, රෝහිත් ෂර්මා 82, රිදිමන් සහා 39, ටේ‍රන්ට් බෝල්ට් 28/2, මැතිව් හෙන්රි 44/3, මිචෙල් සෑන්ට්නර් 51/3)

 

නවසීලන්තය අසීරු අඩියක

අවසන් පිතිකරුවන් තිදෙනා එකතු කළ ලකුණු 77 නිසා සිය පළමු ඉනිම වෙනුවෙන් ලකුණු 316 ක් ලබාගත් ඉන්දියානුවෝ කොල්කටාහි ඊඞ්න් ගාර්ඞ්න්ස් පිටියේදී පැවැත්වෙන දෙවැනි ටෙස්ට් තරගයේ දෙවැනි දිනය වන අද (1 වැනිදා) තරගයේ පාලනය අතට ගැනීමට සමත් වූහ.

දෙවැනි දිනය සඳහා තරගය නතර කරන විට නවසීලන්තය ලකුණු 128 කට කඩුලු 7 ක් දැවී අසීරු අඩියත පසුවූ අතර ඒ වන විට කඩුල්ලේ රැදී සිටි බී. ජේ. වෙට්ලින් නොදැවී ලකුණු 12 ක්ද, ජීතන් පටේල් නොදැවී ලකුණු 5 ක්ද ලබා සිටියහ. ඒ අනුව ඉන්දියාවට වඩා නවසීලන්තය තවත් ලකුණු 188 ක් පසුපසින් සිටින අතර ඔවුන් සතුව තවත් කඩුලු 3 ක් ඉතිරිය පවතී.

ඉන්දීය කණ්ඩායමේ සාර්ථකම පන්දුයවන්නා බවට පත්වූ බුවනේෂ්වර් කුමාර් ලකුණු 33 කට කඩුලු 5 ක් දවාගැනීමට සමත් වූ අතර ඉන් 3 ක්ම පන්දුව කෙළින්ම කඩුල්ලේ වැදීම නිසා දැවීගිය අවස්ථා විය. මාටින් ගප්ටිල් (13), හෙන්රි නිකලස් (01) සහ මැට් හෙන්රි (00) එළෙස පන්දුව කෙළින්ම කඩුල්ලේ වැදීමෙන් දැවීගිය පිතිකරුවෝ වූහ.

අද දින දිවා ආහාරයෙන් පසුව නවසීලන්ත පිලේ තවත් කඩුලූ දෙකක් දවාගැනීමට ඉන්දියානුවන් සමත් වූවත් වර්ෂාව නිසා තේ පානයටත් පෙර තාවකාලිකව තරගය නතර කරන විට නවසීලන්ත පිල සිය පළමු ඉනිම වෙනුවෙන් කඩුලූ 4 ක් දැවී ලකුණු 85 ක් ලබා සිටියේය.

තරගාවලියේ පළමු තරගය ජයගැනීම නිසා මේ වන විටත් 1-0 ක් ලෙසින් ඉදිරියෙන් සිටින ඉන්දීය කණ්ඩායමට දෙවැනි තරගයේ මුල් දිනය නිමා වන විට කඩුලූ 7 ක් දැවී ලබාගත හැකිවූයේ ලකුණු 239 ක් පමණි. එහෙත් රිදිමන් සහා (නොදැවී 54) ලබාගත් අර්ධ ශතකය නිසා පසුපෙළ පිතිකරුවන් තරමක් ධෛර්යවත් වූ අතර අවසානයේදී ලකුණු 300 කඩයිම පසුකරගැනීමට ඉන්දියානුවෝ සමත් වූහ.

නවසීලන්ත පිලේ කඩුලූ 3 ක් ලකුණු 23 කට බිඳ වැටී තිබියදී ලූක් රොන්කි සමග එක්වූ රොස් ටේලර් ලකුණු සංඛ්‍යාව 85 දක්වා ඉහළ දැමූවත් රවීන්ද්‍ර ජදේජාගේ පන්දුවක් හමුවේ කඩුල්ල මුවා කිරීමේ වරදට හසුව රොන්කි දැවී ගියේය. ඒ සමගම වර්ෂාව පැමිණියෙන් නවසීලන්තයට තරමක සහනයක් ඇතිවූවද නවසීලන්තය ඒ වන විටත් ඉන්දියාවට වඩා ලකුණු 231 ක් පසුපසින් සිටියේය.

රොස් ටේලර් නොසැලී පිතිහරඹයේ යෙදුණද ලූක් රොන්කිට නම් වාසනාව තිබිණ. අතිරේක කී‍්‍රඩක ගෞතම් ගම්බීර් අතින් උඩපන්දුවක් ගිළිහී යන විට රොන්කි ලකුණු 16 ක් ලබා සිටියේය. රොන්කි තවත් ලකුණු 5 ක් ලබාගත්තාට පසුව ජදේජාගේ පන්දුවක් හමුවේ කඩුල්ල මුවා කිරීමේ වරදට හසුවූයේ යයි කළ ප‍්‍රබල ඉල්ලීමකින් රොන්කි ගැලවුණද ලකුණු 35 දී ජදේජා ජයගත්තේය.

 

ඉන්දියාව පළමු ඉනිම – සියලු දෙනා දැවී 316
(චෙතේෂ්වර් පුජාරා 87, අජින්ක්‍යා රහනේ 77, රවිචන්ද්‍රන් අෂ්වින් 26, රිධිමන් සාහ නොදැවී 54, රවින්ද්‍ර ජදේජා 14, මොහොමඩ් සාමි 14, මැට් හෙන්රි 46/3, ට්‍රෙන්ට් බෝල්ට් 46/2, ජීතන් පටේල් 66/2)

නවසීලන්තය පළමු ඉනිම – කඩුලු 7 ක් දැවී 128
(මාටින් ගප්ටිල් 13, රොස් ටේලර් 36, ලුක් රොන්කි 35, බී. ජේ. වෙට්ලින් නොදැවී 12, බුවනේෂ්වර් කුමාර් 33/5)

 

- 077

පුජාරා – රහනේ ඉන්දියාව ඔසවා තබති

සංචාරක නවසීලන්ත කණ්ඩායම සහ ඉන්දීය කණ්ඩායම අතර කොල්කටාහි ඊඞ්න් ගාඞ්න්ස් ක්‍රීඩාංගණයේදී පැවැත්වෙන දෙවැනි ටෙස්ට් තරගයේ පළමු දිනය වූ අද (30 වැනිදා) තරගය නතර කරන විට පළමු ඉනිම වෙනුවෙන් පන්දුවට පහරදෙමින් සිටි ඉන්දීය කණ්ඩායම කඩුලු 7 ක් දැවී ලකුණු 239 ක් ලබා සිටියේය.

දිනය නිමාවන විට රිධිමන් සාහ නොදැවී ලකුණු 14 ක් ලබා කඩුල්ලේ රැදී සිටි අතර රවින්ද්‍ර ජදේජා ලකුණු නොලබා කඩුල්ලේ රැදී සිටියේය.

ඉන්දීය කණ්ඩායමේ ආරම්භක පිතිකරු යුගළය වූ ශිකර් ධවාන් (01) සහ මුරලි විජේ (09) ලකුණු 10 සීමාව ඉක්මවා යෑමටත් මත්තෙන් ආපසු ක්‍රීඩාගාරයට හරවා යැවීමට මැට් හෙන්රි සමත් විය.

මුලු ලකුණු සංඛ්‍යාව 46 ක් වන විට ටේ‍රන්ට් බෝල්ට්ගේ පන්දුවක් හමුවේ ඉනිමේ තෙවැනි කඩුල්ල ලෙස ලකුණු 9 ක් ලබා සිටි නායක විරාට් කෝලිද දැවීයෑම නිසා ඉන්දීය කණ්ඩායම තරමක් අසීරු තත්ත්වයකට පත් විය.

කෙසේ වුවත් සිවුවැනි කඩුල්ල වෙනුවෙන් ලකුණු 141 ක සම්බන්ධතාවක් ගොඩනැගූ චෙතේෂ්වර් පුජාරා (87) සහ අජින්ක්‍යා රහනේ (77) ඉන්දීය කණ්ඩායම ස්ථාවර මට්ටමකට රැගෙන ආහ. පුජාරාගේ අර්ධ ශතකයට හතරේ පහර 17 ක් ඇතුළත් වූ අතර රහනේගේ අර්ධ ශතකයට හතරේ පහර 11 ක් ඇතුළත් විය.

නීල් වෝග්නර්ගේ පන්දුවක් හමුවේ මාටින් ගප්ටිල් අතට උඩපන්දුවක් දෙමින් පුජාරා දැවී ගියේය. රහනේ දැවී ගියේ ජීතන් පටේල්ගේ පන්දුවක් හමුවේ කඩුල්ල මුවා කිරීමේ වරදට හසුවෙමිනි.

පුජාරාගේ දැවීයෑමෙන් අනතුරුව පිටියට පිවිසි රෝහිත් ශර්මාටද වැඩි වේලාවක් කඩුල්ලේ රැදීසිටීමට ජීතන් පටේල් ඉඩ දුන්නේ නැත. ලකුණු 2 ක් ලබා සිටියදී පටේල්ගේ පන්දුවක් හමුවේ ටොම් ලේතම් අතට උඩ පන්දුවක් දෙමින් ශර්මා දැවී ගියේය.

දක්ෂ පන්දු යැවීමක නිරත වූ මැට් හෙන්රි ලකුණු 35 කට කඩුලු 3 ක් දවාගත් අතර ඔහුට අනගි සහයක් දුන් ජීතන් පටේල් ලකුණු 66 කට කඩුලු 2 ක් දවාගත්තේය.


ඉන්දියාව පළමු ඉනිම – කඩුලු 7 කට 239
(චෙතේෂ්වර් පුජාරා 87, අජින්ක්‍යා රහනේ 77, රවිචන්ද්‍රන් අෂ්වින් 26, රිධිමන් සාහ නොදැවී 14, මැට් හෙන්රි 35/3, ජීතන් පටේල් 66/2)


- 036

 

ඵෙතිහාසික 500 වැනි තරගයේදී ඉන්දියාවට ජය

ඉන්දීය ටෙස්ට් ක්‍රිකට් ඉතිහාසයට ස්වර්ණමය මතක සටහනක් එක් කළ විරාට් කෝලි ඇතුළු පිරිවර ඉන්දියාවේ 500 වැනි ටෙස්ට් තරගයේදී ලකුණු 197 ක අති විශිෂ්ට ජයක් ලබාගැනීමට සමත් වූහ. කාන්පූර් නුවර ග්‍රීන් පාක් ක්‍රීඩාංගණයේදී අද නිමාවට පත්වූ පළමු ටෙස්ට් තරගයේදී ඉන්දියානුවෝ නවසීලන්තයට එරෙහිව මෙම ජයග්‍රහණය අත්කරගත්හ.

ඉන්දීය පිල අභියෝග කළ ලකුණු 434 ක ඉලක්කය හඹායාමට ඊයේ පස්වරුවේ පිටියට පිවිසි නවසීලන්ත පිල අද දිවා ආහාරයෙන් මඳ වේලාවකට පසුව සම්පූර්ණයෙන්ම දැවී ගියේය. දඟ පන්දු යවන්නන්ගේ මැජික්කාරයා, රවිචන්ද්‍රන් අශ්වින් විසින් නවසීලන්ත පිලේ අවසන් පිතිකරු නීල් වැග්නර් කඩුල්ල මුවා කිරිමට හසුකර ගනු ලැබීමත් සමග තරගය නිමාවට පත්විය.

නවසීලන්ත දෙවැනි ඉනිමේ දී කඩුලු 6 ක්ම උදුරාගත් 30 හැවිරිදි දඟ පන්දු යවන්නා මෙම තරගයේදී දවාගන්නා ලද කඩුලු සංඛ්‍යාව 10 කි.

ඊයේ දිනය නිමාවනවිට ලකුණු 93 කට කඩුලු 4 ක් බිඳ වැටී තිබූ නවසීලන්ත ඉනිම ලකණු 236 කට සීමා කළ අශ්වින් සිය ටෙස්ට් තරග දිවියේ දී 19 වැනි වතාවටත් කඩුලු 5 සීමාව පසුකළ අතර රවීන්ද්‍ර ජදේජා සමග එක්වී ප්‍රතිවාදින්ගේ කඩුලු 20 න් 16 ක් බෙදා හදා ගත්තේය.

ඊයේ පස්වරුවේ නොදැවී සිටි ලුක් රොන්කි සහ මිචෙල් සැන්ට්නර් අද උදෑසන නැවතත් අශ්වින්ගේ සහ ජදේජාගේ පරික්ෂා කිරිම් ගණනාවකින් කඩුලු බේරාගනිමින් සිය කණ්ඩායමේ ගෞරවය රැකදීමට නොගත් උත්සාහයක් නැත.

මුරකරු පිතිකරු ලෙස ඊයේ පස්වරුවේ පිටියට පිවිසි සැන්ට්නර් සිය රාජකාරිය අකුරටම ඉටු කරමින් රොන්කිට  දුන් අගනා සහය නිසාම පස්වැනි කඩුල්ල වෙනුවෙන් ලකුණු 102 ක සම්බන්ධතාවක් ගොඩ නැගිණි.

කෙසේවෙතත් අද දිවා ආහාරයට පෙර ලැබුණු අවසන් සිසිල්පැන් පානයෙන් පසුව වමතින් දඟපන්දු යවන ජදේජා යැවූ පළමු ඕවරයේ සිවුවැනි පන්දුවෙන් රොන්කි දැවීයාමත් සමග ඉන්දීය ක්‍රීඩකයන් ජයග්‍රහණයේ සතුට සැමරීමට කල් මැරුවේ පුදුමාකාර ඉවසීමකිනි.

රොන්කිට නොදෙවැනි පිතිහරඹයක යෙදුණු සැන්ට්නර් සත්කාරකයන්ගේ ජයග්‍රහණය තරමක් දුරට පමා කළේ සටන්කාමී අර්ධ ශතකයකට හිමිකම් කියමිනි. ඒ කෙසේවෙතත්  මුලු ලකුණු සංඛ්‍යාව 223 දී අශ්වින් හමුවේ ඔහු දැවීයාමත් සමග ඉනිම නිමාවීමට වැඩිවේලාවක් ගතවූයේ නැත.


ඉන්දියාව පළමු ඉනිම – සියලුදෙනා දැවී ලකුණු 318 යි
(ලෝකේෂ් රාහුල් 32, මුරලි විජේ 65, චෙට්ස්වර් පුජාරා 62, රෝහිත් ෂර්මා 35, රවිචන්ද්‍රන් අශ්වින් 40, රවීන්ද්‍ර ජදේජා නොදැවී 42, ටේ‍රන්ට් බෝල්ට් 67/3, නීල් වැග්නර් 42/2, මිචෙල් සැන්ට්නර් 94/3, මාක් ක්‍රෙග් 59/1, ඉෂ් සෝදි 50/1)

නවසීලන්තය පළමු ඉනිම – සියලුදෙනා දැවී ලකුණු 262 යි.
(මාටින් ගප්ටිල් 21, ටොම් ලේතම් 58, කේන් විලියම්සන් 75, ලූක් රොන්කි 38, මිචෙල් සැන්ට්නර් 32, බී.ජේ.වොට්ලිං 21,  උමේෂ් යාදෙව් 33/1, රවීන්ද්‍ර ජදේජා 73/5, රවිචන්ද්‍රන් අශ්වින් 93/4)

ඉන්දියාව දෙවැනි ඉනිම – කඩුලු 5 ක් දැවී ලකුණු 377 යි
(ලෝකේශ් රාහුල් 38, මුරලි විජේ 76, චෙට්ස්වර් පුජාරා 78, විරාට් කෝලි 18, අජින්ක්‍යා රහනේ 40, රෝහිත් ෂර්මා නොදැවී 68, රවීන්ද්‍ර ජදේජා නොදැවී 50, මිචෙල් සැන්ට්නර් 79/2, ඉෂ් සෝදි 99/2)

නවසීලන්තය දෙවැනි ඉනිම – සියලුදෙනා දැවී ලකුණු 236 යි.
කේන් විලියම්සන් 25, ලුක් රොන්කී 80, මිචෙල් සැන්ට්නර් 71, බී.ජේ.වොට්ලිං 18, ඉෂ් සෝදී 17, මොහොමඞ් සමී 18/2, රවිචන්ද්‍රන් අශ්වින් 132/6, රවීන්ද්‍ර ජදේජා 56/1)


- 077

 

නවසීලන්තය ලකුණු 341 ක් පසුපසින්

සංචාරක නවසීලන්තය සහ ඉන්දියාව අතර ඉන්දියාවේ කාන්පූර්හිදී පැවැත්වෙන පළමු ටෙස්ට් ක්‍රිකට් තරගයේ සිව්වැනි දිනය අවසන් වන විට දෙවැනි ඉනිම වෙනුවෙන් පන්දුවට පහර දෙමින් සිටි නවසීලන්ත කණ්ඩායම කඩුලු 4 ක් දැවී ලකුණු 93 ක් ලබා සිටියේය.

ඒ අනුව ඔවුහු කඩුලු 6 ක් අතැතව ඉන්දියාවට වඩා තවත් ලකුණු 341 ක් පසුපසින් සිටිති.

දිනය නිමාවන විට ලුක් රොන්කි සහ රාත්‍රී මුරකරු පිතිකරු මිචෙල් ස්ටනර් පිළිවෙළින ලකුණු 38 ක්  හා 8 ක් බැගින් ලබා නොදැවී කඩුල්ලේ රැදී සිටියහ.

දක්ෂ පන්දුයැවීමක නිරත  වූ රවිචන්ද්‍රන් අෂ්වින් ලකුණු 68 කට ඉන්දීය කණ්ඩායමේ මුල් පිතිකරුවන් තිදෙනාවම අාපසු ක්‍රීඩාගාරයට හරවා යැවීමට සමත් විය.

අද දිනයේදී අර්ධ ශතක ලබාගත් චෙටොෂ්වර් පුජාරා (78), රෝහිත් ශර්මා (නොදැවී 68) සහ රවින්ද්‍ර ජදේජා (නොදැවී 50) එක්ව ඉන්දීය දෙවැනි ඉනිමේ ලකුණු සංඛ්‍යාව ඉහළ දැමූහ.

 

ඉන්දියාව පළමු ඉනිම – සියලුදෙනා දැවී ලකුණු 318
(ලෝකේෂ් රාහුල් 32, මුරලි විජේ 65, චේටස්වර් පුජාරා 62, රෝහිත් ෂර්මා 35, රවිචන්ද්‍රන් අශ්වින් 40, රවීන්ද්‍ර ජඬේජා නොදැවී 42, ටේ‍රන්ට් බෝල්ට් 67/3, නීල් වැග්නර් 42/2, මිචෙල් සැන්ට්නර් 94/3, මාක් ක්‍රෙග් 59/1, ඉෂ් සෝදි 50/1)

නවසීලන්තය පළමු ඉනිම – සියලුදෙනා දැවී ලකුණු 262
(මාටින් ගප්ටිල් 21, ටොම් ලේතම් 58, කේන් විලියම්සන් 75, ලූක් රොන්චි 38, මිචෙල් සැන්ට්නර්32, බී.ජේ.වොට්ලිං 21,  උමේෂ් යාදෙව් 33/1, රවීන්ද්‍ර දජේදා 73/5, රවිචන්ද්‍රන් අශ්වින් 93/4)

ඉන්දියාව දෙවැනි ඉනිම – එක් කඩුලු 5 ක් දාවී ලකුණු 377
(ලෝකේශ් රාහුල් 38, මුරලි විජේ 76, චේටස්වර් පුජාරා 78, විරාට් කෝලි 18, අජින්ක්‍යා රහනේ 40, රෝහිත් ශර්මා නොදැවී 68, රවින්ද්‍ර දජේජා නොදැවී 50, මිචෙල් ස්ටනර් 79/2, ඉෂ් සෝදි 99/2)

නවසීලන්තය දෙවැනි ඉනිම – කඩුලු 4 ක් දැවී ලකුණු 93
(කේන් විලියම්මසන් 25, ලුක් රොන්කි නොදැවී 38, රවිචන්ද්‍රන් අශ්වින් 68/3)

 

- 036